‘‘สหสฺสวฏฺฏิํ ปาทาสิํ, พุทฺธสฺส โลกพนฺธุโน;

สตฺตาหํ ปชฺชลิตฺวาน, ทีปา วูปสมิํสุ เมฯ

[426]

‘‘เตน จิตฺตปฺปสาเทน, เจตนาปณิธีหิ จ;

ชหิตฺวา มานุสํ เทหํ, วิมานมุปปชฺชหํฯ

[427]

‘‘อุปปนฺนสฺส เทวตฺตํ, พฺยมฺหํ อาสิ สุนิมฺมิตํ;

สมนฺตโต ปชฺชลติ, ทีปทานสฺสิทํ ผลํฯ

[428]

‘‘สมนฺตา โยชนสตํ, วิโรเจสิมหํ ตทา;

สพฺเพ เทเว อภิโภมิ, ทีปทานสฺสิทํ ผลํฯ

[429]

‘‘ติํสกปฺปานิ เทวินฺโท, เทวรชฺชมการยิํ;

น มํ เกจีติมญฺญนฺติ, ทีปทานสฺสิทํ ผลํฯ

[430]

‘‘อฏฺฐวีสติกฺขตฺตุญฺจ, จกฺกวตฺตี อโหสหํ;

ทิวา รตฺติญฺจ ปสฺสามิ, สมนฺตา โยชนํ ตทาฯ

[431]

‘‘สหสฺสโลกํ ญาเณน, ปสฺสามิ สตฺถุ สาสเน;

ทิพฺพจกฺขุมนุปฺปตฺโต, ทีปทานสฺสิทํ ผลํฯ

[432]

‘‘สุเมโธ นาม สมฺพุทฺโธ, ติํสกปฺปสหสฺสิโต;

ตสฺส ทีโป มยา ทินฺโน, วิปฺปสนฺเนน เจตสาฯ

[433]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา อนุรุทฺโธ เถโร อิมา คาถาโย อภาสิตฺถาติฯ

อนุรุทฺธตฺเถรสฺสาปทานํ จตุตฺถํฯ

3-5. ปุณฺณมนฺตาณิปุตฺตตฺเถรอปทานํ

[434]

‘‘อชฺฌายโก มนฺตธโร, ติณฺณํ เวทาน ปารคู;

ปุรกฺขโตมฺหิ สิสฺเสหิ, อุปคจฺฉิํ นรุตฺตมํฯ

[435]

‘‘ปทุมุตฺตโร โลกวิทู, อาหุตีนํ ปฏิคฺคโห;

มม กมฺมํ ปกิตฺเตสิ, สงฺขิตฺเตน มหามุนิฯ

[436]

‘‘ตาหํ ธมฺมํ สุณิตฺวาน, อภิวาเทตฺวาน สตฺถุโน;

อญฺชลิํ ปคฺคเหตฺวาน, ปกฺกมิํ [ปกฺกามิํ (สี. สฺยา.)] ทกฺขิณามุโขฯ

[437]

‘‘สงฺขิตฺเตน สุณิตฺวาน, วิตฺถาเรน อภาสยิํ [อเทสยิํ (สี. สฺยา.)];

สพฺเพ สิสฺสา อตฺตมนา, สุตฺวาน มม ภาสโต;

สกํ ทิฏฺฐิํ วิโนเทตฺวา, พุทฺเธ จิตฺตํ ปสาทยุํฯ

[438]

‘‘สงฺขิตฺเตนปิ เทเสมิ, วิตฺถาเรน ตเถวหํ [เทเสสิํ วิตฺถาเรนปิ ภาสยิํ (ก.)];

อภิธมฺมนยญฺญูหํ , กถาวตฺถุวิสุทฺธิยา;

สพฺเพสํ วิญฺญาเปตฺวาน, วิหรามิ อนาสโวฯ

[439]

‘‘อิโต ปญฺจสเต กปฺเป, จตุโร สุปฺปกาสกา;

สตฺตรตนสมฺปนฺนา, จตุทีปมฺหิ อิสฺสราฯ

[440]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา ปุณฺโณ มนฺตาณิปุตฺโต เถโร อิมา คาถาโย อภาสิตฺถาติฯ

ปุณฺณมนฺตาณิปุตฺตตฺเถรสฺสาปทานํ ปญฺจมํฯ

3-6. อุปาลิตฺเถรอปทานํ

[441]

‘‘นคเร หํสวติยา, สุชาโต นาม พฺราหฺมโณ;

อสีติโกฏินิจโย, ปหูตธนธญฺญวาฯ

[442]

‘‘อชฺฌายโก มนฺตธโร, ติณฺณํ เวทาน ปารคู;

ลกฺขเณ อิติหาเส จ, สธมฺเม ปารมิํ คโตฯ

[443]

‘‘ปริพฺพาชา เอกสิขา [เอกภิกฺขา (ก.)], โคตมา

พุทฺธสาวกา [สพฺพตฺถปิ เอวเมว ทิสฺสติ]ฯ

จรกา ตาปสา เจว, จรนฺติ มหิยา ตทาฯ

[444]

‘‘เตปิ มํ ปริวาเรนฺติ, พฺราหฺมโณ วิสฺสุโต อิติ;

พหุชฺชโน มํ ปูเชติ, นาหํ ปูเชมิ กิญฺจนํฯ

[445]